You are here: HomeNEWSመንግስት ሃገሪቱን ከፍ ወዳለ ምዕራፍ በማሸጋገር አንድነቷን ጠብቃ የምትቆይበትን መንገድ ያረጋግጣል - ጠ/ሚ አብይ አህመድ

መንግስት ሃገሪቱን ከፍ ወዳለ ምዕራፍ በማሸጋገር አንድነቷን ጠብቃ የምትቆይበትን መንገድ ያረጋግጣል - ጠ/ሚ አብይ አህመድ Featured

Published in Latest News
Rate this item
(0 votes)

ኢትዬ ዴሞክራሲ፣ አዲስ አበባ (መጋቢት 24፣ 2010) - የኢፌዴሪ የህዝብ ተወካዮች ምክር ቤት ዛሬ ባካሄደው ልዩ ስብሰባው የሀገሪቱን ጠቅላይ ሚኒስትር ሰይሟል።

 

በምክር ቤቱ አብላጫ መቀመጫ ያለው ኢህአዴግ እጩ አድረጎ ያቀረባቸው ዶክተር አብይ አህመድም በምክር ቤቱ ሙሉ ድምፅ በጠቅላይ ሚኒስትርነት ተሰይመዋል።

 

ጠቅላይ ሚኒስትሩ ቃለ መሃላ ከፈፀሙ በኋላ ባሰሙት ንግግር፥ የስልጣን ሽግግሩ ታሪካዊና ሁሉን አቀፍ የህገ መንግስት መሰረት መጣሉን ማሳያ ነው ብለዋል።

 

ጠቅላይ ሚኒስትሩ በንግግራቸው ከቅርብ አመታት ወዲህ በሃገሪቱ ለተከሰተው ፖለቲካዊ አለመረጋጋት የመፍትሄ አካል ለመሆንና የሃገርን ክብርና ብሄራዊ ጥቅምን በተሻለ ሁኔታ ለማረጋገጥ ምሳሌ በሆነ መልኩ ስልጣናቸውን ላሸጋገሩት ለቀድሞው ጠቅላይ ሚኒስትር ምስጋናቸውን አቅርበዋል።

 

ከዚህ ቀደም አዲስ የፖለቲካ ምዕራፍ ለመጀመር እድሎች አግኝተን በአግባቡ መጠቀም አለመቻሉን ያነሱት ጠቅላይ ሚኒስትሩ፥ የስልጣን ሽግግሩ አዲስ ምዕራፍ የሚጀመርበት በመሆኑ በአግባቡ መጠቀም እንደሚገባ ተናግረዋል።

 

ኢህአዴግ ልማታዊ ዴሞክራሲያዊ ስርዓትን በመያዝ ሃገሪቱን በመራባቸው አመታት መሰረታዊ ለውጥ በማምጣት ህገ መንግስታዊና ፌደራላዊ ስርዓት መገንባቱን አንስተዋል።

 

አሁን ላይም ከተመዘገቡ ስኬቶች ባለፈ ላልተሳኩ እቅዶች በአትኩሮት መስራት እንደሚገባም ጠቅሰዋል።

 

ሃገሪቱን ከፍ ወዳለ ምዕራፍ በማሸጋገር አንድነቷን ጠብቃ የምትቆይበትን መንገድ እያረጋገጡ መሄድም ትኩረት ሊሰጠው እንደሚገባ አጽንኦት ሰጥተዋል፤ ፈተናዎችን ወደ እድልና መልካም አጋጣሚዎች በመቀየር መጠቀም እንደሚገባም በመጠቆም።

 

ኢትዮጵያ በርካታ ዘመን የሚሻገር ታሪክ ያላት ሃገር ያላት ሃገር ናት ያሉት ጠቅላይ ሚኒስትሩ፥ የኢትዮጵያውያን ህብረት ጠላቶችን በማንበርከክ ዛሬ ላይ ያደረሰና ለሌሎች ህዝቦች የነጻነት ትግል አርዓያ መሆኑን አስረድተዋል። 

 

መላው የሃገሪቱ ህዝቦችም ልዩነታቸውን አቻችለው አንድነታቸውን ማጠናከር እንደሚገባቸውም ገልጸዋል፤ በልዩነት ውስጥ መደማመጥና በመርህ ላይ መግባባት ሲቻል የሃሳብ ልዩነት መልካም አጋጣሚ ይፈጥራልም ነው ያሉት።

 

ጠቅላይ ሚኒስትሩ በንግግራቸው ዴሞክራሲ ማስፈን የህልውና ጉዳይ መሆኑን ጠቅሰው፥ የዜጎች ሰብዓዊና ዴሞክራሲያዊ መብቶች በተለይም፥ ሃሳብን የመግለጽ፣ የመሰባሰብና የመደራጀት መብቶች በህገ መንግስቱ መሰረት ሊከበሩ ይገባል ብለዋል።

 

ከዚህ ጋር ተያይዞም ለዜጎች ነጻነት እውቅና የሰጠውን ህግ መንግስታዊ ስርዓት በአግባቡ መተግበርና ማክበር እንደሚገባም አንስተዋል።

 

በመደማመጥ የሃሳብ ልዩነትን ማስተናገድም በዴሞክራሲያዊ አስተሳሰብ የመጀመሪያውም ሆነ የመጨረሻው መርህ ሊሆን ይገባልም ነው ያሉት በንግግራቸው።

 

ዜጎችም ለዴሞክራሲ ስርዓት ግንባታ መጠናከር የድርሻቸውን ሊወጡ እንደሚገባም አስገንዝበዋል።

 

ሀገሪቱ ስር የሰደዱ ችግሮች እንዳሉባት በማንሳት፥ በተለይም የዳበረ ዴሞክራሲ አለመኖር፣ ስር የሰደደ ድህነት፣ የተደራጀ የሙስና እና ብልሹ አሰራር መስፋፋት እና የመልካም አስተዳደር እጦት ዋና ዋና መሆናቸውን አንስተዋል።

 

ዜጎች በሀገራቸው ከቦታ ቦታ የመዘዋወር እና ሀብት የማፍራት መብታቸው መከበር አለበት ያሉት ጠቅላይ ሚኒስትሩ፥ እንደዚህ ዓይነት ተገቢ ያልሆነ ድርጊት እንዲያበቃ እና ዳግም እንዳይፈጠር መስራት አለብን ብለዋል።

 

የሁሉም ድምጽ የሚሰማበት ሁሉንም የሚያሳትፍ ዴሞክራሳያዊ ስርዓት የመገንባት ሂደቱን ማጠናከር ይገባልም ብለዋል በንግግራቸው።

 

በዴሞክራሲ ስርዓት ግንባታ ውስጥም መንግስት የዜጎችን መብቶች ለማክበርና ህግን ለማስከበር በጽናት እንደሚሰራ ጠቅሰው፥ ዜጎችም በሰላማዊ መንገድ መብቶቻቸውን ሊጠይቁ እንደሚገባ አንስተዋል።

 

በዴሞክራሲ ስርዓት የሚታዩ ክፍተቶችን ለማሻሻልም አስፈላጊው ማሻሻያ ይደረጋል ብለዋል፤ ከሁሉም በፊት ሰላም የሁሉም መሰረት በመሆኑ ለሰላም መስራት ይገባል በማለት።

 

የውጭ ግንኙነት በተመለከተም ኢትዮጵያ የበርካታ ዓለም አቀፋዊ እና አህጉራዊ ተቋማት መስራችና መቀመጫ እንደመሆኗ፥ በጋራ ተጠቃሚነትና እኩልነት ላይ የተመሰረተን ፖሊሲ አጠናክረን እንቀጥላለን ብለዋል።

 

ከአፍሪካውያን ሃገራት ጋርም በጋራ እንሰራለን ብለዋል፤ ከዚህ ባለፈም ከኤርትራ መንግስት ጋር ለአመታት ሰፍኖ የቆየው አለመግባባት እልባት ያገኝ ዘንድ እንዲያበቃ ያላቸውን ፍላጎት ገልጸዋል።

 

ለሁለቱ ህዝቦች የጋራ ተጠቃሚነት ሲባልም ልዩነቶችን በውይይት ለመፍታት መንግስት ያለውን ዝግጁነት ገልጸው የኤርትራ መንግስትም ተመሳሳይ አቋም እንዲይዝ ጠይቀዋል።

 

ሙስናና እየተስፋፋ የህዝቡ የቅሬታ ምንጭ መሆኑን የጠቀሱት ዶክተር አብይ ይህን ሂደት ለመከላከል መረባረብ እንደሚገባ ጠቁመዋል።

 

ከዚህ አንጻርም የተደራጀ ሙስና እና የሃብት ምዝበራን በመመከት ወቅቱ የፈጠረውን ልዩ አጋጣሚ በመጠቀምና ሃገራዊ አቅምን በማቀናጀት ለጋራ ብልፅግና መስራት እንደሚገባም ነው ያነሱት።

 

ባለፉት ጊዜያት በተሰራ ስራ በተመዘገበው ሃገራዊ እድገት በሰው ሃይል ልማት ግንባታ በድህነት ቅነሳ መሰል ዘርፎች ስኬቶች መመዝገባቸውን አስረድተዋል።

 

የውጭ ምንዛሪ ግኝትን ለማበረታታት፣ የፋይናንስ ዘርፉን ጤናማ ለማድረግ፣ የፋይናስ አገልግሎቱን ተደራሽነትና አካታችነት ለማስፋት፣ የስራ እድል ለመፍጠር፣ የዜጎችን የነፍስ ወከፍ ገቢ ለማሳደግና ድህነትን ለመቀነስ የሚያስችሉ የፖሊሲ እርምጃዎች ተወስደዋልም ብለዋል።

 

ይሁን እንጂ የኢኮኖሚ እድገቱንና የማክሮ ኢኮኖሚውን የሚፈታተኑ ችግሮች ተከስተዋል ነው ያሉት፤ የዋጋ ንረት፣ የውጭ ንግድ አለማደግ፣ የውጭ ምንዛሪ ፍላጎትና አቅርቦት አለመመጣጠን፣ የውጭ እዳ ጫና፣ ኑሮ ውድነት እና የሃገር ውስጥ ቁጠባና ኢንቨስትመንት መካከል ያለው ልዩነት መስፋት ችግሮች እንደነበሩም ነው የገለጹት።

 

በግብርናው ዘርፍ አበረታች ስራ ቢሰራም በተገቢው ሁኔታ በቴክኖሎጅ መደገፍ ባለመቻሉ መገኘት ያለበት የኢኮኖሚ ትሩፋት አለመገኘቱንም አንስተዋል።

 

ለተከሰቱ ችገሮች ሁሉ የመፍትሄ ቁልፍ በሆነው የትምህርት ዘርፍ ከእድገትና ጥራት ጋር በትኩረት እንደሚሰራ አስረድተዋል።

 

እነዚህንና ሌሎች ችግሮች ለመቅረፍ የሁለተኛው የእድገትና ትራንስፎርሜሽን የእስካሁን አፈጻጸም በመገመግም አስፈላጊ የፖሊሲ እርምጃ በመውሰድ ፈጣን ኢኮኖሚያዊ እድገት ለማስመዝገብ ይሰራልም ብለዋል።

 

 

ከወጣቶች አንጻርም ከስራ ፈጠራ ባለፈ ወጣት ባለሃብቶች እንዲፈጠሩ በትኩረት እንደሚሰራ ጠቁመው፥ ወጣቱም ሃገሪቱን ለመገንባት በሚደረገው ሂደት በግንባር ቀደምትነት እንዲሳተፉም ጥሪ አቅርበዋል።

 

ሴቶችም በሃገራዊ ግንባታ ከዚህ ቀደም ሲያደርጉት የነበረውን አስተዋጽኦ እንዲያጠናክሩም ነው ጥሪያቸውን ያቀረቡት።

 

ሴቶችን ያገለለ ሃገራዊ ትንሳኤ ማረጋገጥ የማይቻል በመሆኑም መንግስት ለሴቶች ሁሉን አቀፍ ተሳትፎና ተጠቃሚነት በትኩረት ይሰራል ብለዋል።

 

የተሻለች ሀገር የመገንባት ሂደቱንም በአንድነት መንፈስ በጋራ ማሳካት ያስፈልጋል ያሉት ዶክተር አብይ፥ በቀሪው የእድገትና ትራንስፎርሜሽን እቅድ ዘመን ቀሪ የልማት ስራዎችን ለማሟላት ጥረት እንደሚደረግ አስታውቀዋል።

 

በውጭ ያሉ ኢትዮጵያውያንም የሃገራቸው እንደራሴዎች መሆናቸውን በመገንዘብ መንቀሳቀስ ይገባቸዋልም ነው ያሉት።

 

ኢትዮጵያውያንና ትውልደ ኢትዮጵያውያንም ከልብ ይቅር በመባባልና የትናንቱን ምዕራፍ በመዝጋት በብሄራዊ መግባባት ወደ ቀጣይ ብሩህ ሃገራዊ ምዕራፍ ለመሸጋገር እንዲንቀሳቀሱ ጥሪያቸውን አስተላልፈዋል።

 

የፖለቲካ ፓርቲዎችም በነጻነት እንዲንቀሳቀሱ የተመቻቸና ፍትሃዊ የመወዳደሪያ መድረክ እንዲኖር በመንግስት በኩል ፅኑ ፍላጎት መኖሩን ተረድተው፥ አብሮነትን አደጋ ላይ የሚጥሉና ብሄራዊ ጥቅምን አሳልፈው የሚሰጡ የአስተሳሰብ መስመሮችን በመከላከል የተሻለ የፖለቲካ ባህል ለመፍጠር የሚደረገውን ጥረት እንዲያግዙም ጠይቀዋል።

 

የዳበረ ዴሞክራሲ ለመገንባት፣ ድህነትን ለመቅረፍ፣ ዘረኝነትን ለማስወገድ እንዲሁም የተማረና በምክንያት የሚከራከር ዜጋ ለመፍጠር በሚደረገው ጥረት ሁሉም ኢትዮጵያዊ የድርሻውን እንዲወጣም መልዕክታቸውን አስተላልፈዋል።

 

እንደ ታላቁ የኢትዮጵያ ህዳሴ ግድብ ባሉ ሃገራዊ ፕሮጀክቶች የታየው መሰባሰብም የሃገሪቱን ብልፅግና ለማረጋገጥ በሚደረገው ጥረት ሊደገም እንደሚገባም አንስተዋል። FBC

03161115
Today
Yesterday
This Month
Last Month
All days
3035
4118
86628
75600
3161115

Since April 1, 2014

Photo Gallery